Sociëteit Amicitia 1842
Echo
Ze wore van verkânsie alweer ‘n tiedje trök
Înkele mét ‘ne dikkere kop of ‘ne verbördje rök.
Pjaer dae kwoom van Spanje aaf. Zjaak dae zoot op Kos
en weer trök in eur kefee loeëge ze d’r op los.
Mer de schoeënste det woor Lei-j, och dae woor pas kontênt,
dae vertéldje oeëver Oeësteriêk, al mét ‘n Duits aksênt.
Hae zag: “Vrieëd daen echo, och minse det és fein,
dae ruptj alles nao uch trök, zoeë hieëlemaol van allein.
Mer eîne kieër toen schrok ich mich en det és echt gebuuërdj,
det hejje van zien laeve lânk nog noeëts gehuuërdj
Want wi-j ich reep: ‘ICH GAON D’R EÎNE DRÎNKE’, dao in di-j Alpewej.
toen kwoom ineins as echo trök: “WACHTJ LEI-J, ICH GAON MEJ!”
